நடிகைகள்

 

 

    ஐஸ்வர்யா ராயின் பதில்களைக் கேட்பதைவிட, பார்ப்பது குதூகலம் அளித்தது. ஐஸ்வர்யாவுக்கு அழகாக இருப்பது பழகிவிட்டது. சுற்றுப்பட்டவர்கள் உபாசனையும் பழகிவிட்டது. தொலைக்காட்சிப் பேட்டியில் இவர் நிஜரூபத்தைக் கண்டுபிடிக்கவே முடியாது எனத் தோன்றியது. இவர் பதில்கள் எல்லாம் எங்கேயோ கேட்ட மாதிரியோ, ஒரு இந்திப்பட வசனம் போலவோ இருந்தன. - வாத்தியார், கற்றதும் பெற்றதும் -4.

சமீபத்தில் பூஜா ஹெக்டே பல்வேறு யூடியூப் சேனல்களில் கொடுத்த பேட்டிகளை பார்த்தபோது மிகுந்த வியப்பே மிஞ்சியது.
பொதுவாக எந்த கதாநாயகியை பேட்டி எடுத்தாலும் கேட்கப்படும் கேள்விகளை பத்து விரல்களுக்குள் அடக்கிவிடலாம்.சொல்லப்படும் பதில்களும் காலங்காலமாக சொல்லப்படும் பதில்களாகவே இருக்கும்.


 

    இதில் நடிகைகளை குறைகூற முடியாது.அவர்கள் மிகக்குறுகிய வட்டத்திற்குள் தான் இருந்தாக வேண்டும்.ஒரு காசர் போலவோ மிஷ்கின் போலவோ "இந்தபுத்தகம் படித்தேன்! இந்த உலக சினிமா பார்த்தேன்" என்றெல்லாம் சொன்னால் அத்தோடு அந்த நடிகையை ஓரங்கட்டி விடுவார்கள்.தனுசு பார்வையாளர்கள் மத்தியில் அளித்த ஒரு தொலைக்காட்சி பேட்டியில் டாவின்சி கோட் புத்தகத்தை முதலில் ஆறு பக்கங்கள் தாண்டவே திணறியதாகவும் பிறகு பல்வேறு முயற்சிகளுக்கு பிறகு அதை படித்து முடித்தேன் என்று சொல்லி முடிப்பதற்குள் பெரும் கைதட்டல் ஒலி! இதையே ஒரு நடிகை சொல்லியிருந்தால் "ஆமா இந்த பந்தாவுக்கு குறைச்சல் இல்லை.தமிழ் புத்தகமெல்லாம் படிக்க மாட்டாங்களாமா?" etc.etc... விமர்சனங்கள் குவிந்திருக்கும்!

     பல வருடங்களுக்கு முன் விமான நிலையத்தில் த்ரிஷா அயன் ராண்ட் (Fountainhead) படித்துக்கொண்டிருந்ததை நாமே பார்த்திருக்கிறோம்.ஆனால் த்ரிஷா அதுகுறித்தோ அல்லது வேறு புத்தகங்கள் வாசித்தது குறித்தோ மூச்சு விட்டதில்லை.காரணம் முன்பு சொன்னது தான்!


 

     இதனால்தான் பூஜா ஹெக்டே தான் பார்த்த உலக சினிமாக்கள் குறித்து மிக விரிவாக பேசியதை கண்டபோது ஆச்சரியம் ஏற்பட்டது!

      அதிலும் ஏதோ நெட்பிளிக்ஸ் பிரைம் ஆப்பிள் டிவி போன்றவற்றில் அவர் அப்படங்களை பார்ப்பதில்லை.Bluray மற்றும் 4K டிஸ்க்குகளில் தான் பார்க்கிறார்(அதிலும் முடிந்தளவு criterion collection!)என்பதை அறிந்து பொறாமையே அதிகரித்தது.Owning Physical media copy என்பதே ஓர் சமுத்திர தலைப்பு.அதில் கரைகண்டவராக பேசினார்!
   லாரன்ஸ் ஆஃப் அரேபியா படத்தை எல்லாம் அசல் டிஸ்கில் ஹோம் தியேட்டரில் பார்ப்பது அலாதியான அனுபவம் என்கிறார். Criterion collection முழுவதையும் சேகரிப்பதே வாழ்நாள் லட்சியம்.நான் அதிகம் வெளியில் செல்லும் பெண்ணல்ல.வீட்டிலேயே படங்கள் பார்க்க விரும்புபவள் என்றார்.

 

https://www.instagram.com/reel/Dei9qe6RfH1/?srtk=eDRoZ3ExbmEyaGc0

   
இது நமது பொறாமை நம்பர் 1.காரணம் கடந்த பதினைந்து ஆண்டுகளாகவே சொந்தமாக வீட்டில் சின்ன ஹோம் தியேட்டர்+ டால்பி ஆடியோ(அட்மாஸ் கூட இல்லை.டால்பி டிஜிட்டல்/டிஜிட்டல் பிளஸ் கூட போதும்)+ physical media அமைப்பில் படம் பார்க்கவேண்டும் என்பது ஆயுட்கால கனவாகவே நமக்கு இன்றுவரையிலும் இருக்கிறது.

என்னது கிளாசிக் படங்களை criterion collection disc கள்ல தான் பாக்குறாங்களா? 

 

   பொறாமை நம்பர் 2 :  கேமிங்! 2013-14 காலத்தில் Arkham Asylum , Arkham City ஆகிய கேம்களை விளையாடியதோடு சரி. அதன்பின் அந்தப்பக்கமே போக முடியவில்லை.

 

   ஆனால் இவர் அது குறித்தும் பேசுகிறார்.படப்பிடிப்பு தளங்களிலும் இடைவெளிகளில் Nintendo  Switch கொண்டு விளையாடுவது குறித்தும் சொல்கிறார்.God of War Red dead redemption..etc..etc.. என்று அடுக்கியதை ஏக்கத்துடனே பார்த்தோம்.எத்தனை நேரம் போனது! பகலா? இரவா? என்றே தெரியாதவண்ணம் கேம் விளையாடிய கணங்கள் கண்முன் வந்துபோனது.

 

Nintendo Switch 

 

   உடனே இணைய மொன்னைகள் கூட்டம் "இவ்வளவு தெரிந்து இவ்வளவு படம் பார்த்து என்ன பலன்? இவர் டப்பா படங்களில் தானே நடிக்கிறார்" என்று பொங்கியது. அடேய் இவர் நடித்த நடிக்கும் படங்களுக்கு இவரா தயாரிப்பாளர்? இவரா இயக்குனர்? அல்லது படத்தின் கதையை இவரது கதாபாத்திரத்தை நிர்ணயிக்கும் இடத்திலா இவர் இருக்கிறார்??

    தலைவர் செந்திலை பார்த்து பேசும் வசனம் நினைவுக்கு வந்தது " டேய் **** ஏதோ பேசனும்கிறதுக்காக பேசிட்டு இருக்காத. நல்ல விவரமா பேசு" .இணைய மொன்னைகள் கூட்டத்திற்கு சொல்லப்பட்ட வசனம் தான் அது.

   வெளியுலக தொடர்பை முற்றாக அறுத்து ஹோம் தியேட்டரிலேயே மீத காலத்தை கழிக்க வேண்டும் என்ற நமது  கனவு கனவாகவே இருக்கிறது!

**************************************************

பிரியங்கா மோகன் அளித்த பேட்டி ஒன்றும் முக்கியமானது.தனது கால்ஷீட்டை நிர்வகிக்க ஒரு நிறுவனத்தின் சேவையை பயன்படுத்தி வந்ததாகவும் ஒருகட்டத்தில் அதனுடனான ஒப்பந்தத்தை முடித்துக்கொண்ட தருணத்தில் இருந்தே தன்னைப்பற்றி இணையத்தில் சகட்டுமேனிக்கு கருத்துக்கள்/மீம்/ வீடியோ troll மழை பொழிந்ததை குறிப்பிடுகிறார்!

 

    ஒருகாலத்தில் எந்த வீட்டிலாவது பெண்ணுக்கு திருமணம் நிச்சயம் ஆன உடனேயே வருங்கால மாப்பிள்ளை வீட்டுக்கு மொட்டை கடுதாசிகள் பறக்கும்.பெண் சரியில்லை.அவனோடு சுற்றினாள்.கொஞ்சம் அப்படி இப்படி என்று சகட்டுமேனிக்கு எழுதித்தள்ளுவார்கள் அக்கால  நிஜ மொன்னைகள். இதுதவிர கழிப்பறை சுவற்றில் கரித்துண்டு கொண்டு எழுதிய கதைகள் தனி!

  அந்த பழக்கத்தின் நீட்சியாகவே இந்த இணைய மொன்னைகள் கூட்டம் சகட்டுமேனிக்கு troll செய்து வருகிறது.பிரியங்காவின் கால்ஷீட்டை நிர்வகித்த அந்த நிறுவனம் பல ஆயிரம் பேர்களை நியமித்து பிரியங்கா மோகன் பற்றி பதிவுகளை போட்டு மெனக்கெடவில்லை.அதிக reach கொண்ட சில தலைமை இணைய மொன்னைகளை செமத்தியாக கவனித்து அவர் பற்றி troll பதிவுகளை போட சொன்னது.மற்ற உதிரி இணைய மொன்னைகள் அப்படியே அவற்றை பிடித்து வைரல் ஆக்கியது! செலவே இல்லாமல் ஒருவரின் பெயரை சேதாரம் செய்தாகிவிட்டது! 
     மாத சம்பளத்துக்காக அலுவலகத்தில் அடிமை சாசனம் எழுதிக்கொடுத்தது போக இந்த இணைய மொன்னைகள் கூட்டம் இப்படி ஓசியில் ஒரு நிறுவனத்திற்காக தம் கட்டி வேலை பார்த்தது குறித்து இழிவாக அதுங்களாக உணராதவரை இதை நிறுத்தவோ மாற்றவோ முடியாது!

**************************************************

நஸ்ரியா "சீன்" பட துவக்க விழாவில் சில குறும்பு முகபாவங்களை காட்டியதுதான் தாமதம்.இணைய மொன்னைகள் பொங்கிவிட்டார்கள்!

 

" இளம் வயதில் இப்படியெல்லாம் செய்தது ரசிக்கும்படி இருந்தது.முப்பது வயதானபிறகும்(அப்படி பார்த்தா முந்நூறு தாண்டிய உதயா ஈஸி சேரை விட்டே அசைய கூடாதே!- கும்மாங்கோ) இப்படியெல்லாம் செய்வது ரசிக்கும்படி இல்லை" என்றார்கள்.

   நஸ்ரியாவின் இயல்புத்தன்மையே குறும்புத்தனமும் விளையாட்டுத்தனமும் தான். ஓம் சாந்தி ஓசானா என்ற அற்புதமான படத்தின் முதுகெலும்பே அவர் தான்.அப்படம் அந்தளவு வரவேற்பை பெற்றதற்கு காரணம் நஸ்ரியாவின் அசல் குணாதசியம் அந்த கதாபாத்திரத்தில் வெளிப்பட்டதுதான்!
    மௌனராகம்,கோபுர வாசலிலே(பெரும்பாலான படம்), உள்ளத்தை அள்ளித்தா,உனக்காக எல்லாம் உனக்காக போன்ற படங்களில் கார்த்திக்கின் அசல் தன்மையை காணலாம்.அவரிடம் போய் "இளம் வயதில் நீங்கள் பிராங்க் செய்தது விளையாட்டுதனமாக நடந்து கொண்டது எல்லாம் சரி.அறுபது தாண்டிய பிறகும் இப்படி இருக்கலாமா?" என்று கேட்பது போன்ற அபத்தம் இது.

 

  முனியாண்டி "நாப்பது வயசானாலே _______" என்று கடுமையாக எழுதியது வேறொரு விஷயத்துக்காக என்றாலும் குறிப்பிட்ட வயதை தாண்டியதும் தனது இயல்புத்தன்மையை துறந்து அப்படியே காவி கட்டாத குறையாக சுற்ற வேண்டுமா?இதை சொல்லும் இணைய மொன்னைகள் கூட்டம் இதையெல்லாம் பின்பற்றிக்காட்ட தயாரா?

 

வடக்குபட்டி பஸ் ஸ்டாப்

 Breakdown படத்தை இவ்வளவு தயக்கத்துடனும் தாமதமாகவும் பார்க்க காரணம் விடாமுயற்சி!

 தத்தி தாவுது மனசு படத்தில் வடிவேலு தங்கப்பதக்கம் சிவாஜி கேரக்டரை spoof செய்திருப்பார்.மேலதிகாரி மும்தாஜுக்கு இரண்டு தொலைபேசி அழைப்புகள் வரும்.ஒன்று வடிவேலு குற்றவாளிகளை பிடித்ததற்கு விருது கொடுப்பதாக அறிவிக்கும் அழைப்பு.மற்றொரு அழைப்பு அவரது மனைவி குல்ஃபி ஐஸ்காரனுடன் ஓடிப்போய்விட்டதாக செய்தி வர "நா புறப்படுகிறேன் மேடம்" என்று கண்களில் நீர் தளும்ப நடந்து செல்கையில் மேலதிகாரி மும்தாஜின் மேஜை மேலுள்ள பேனா பென்சில் கோப்புகள் எல்லாவற்றையும் கீழே தள்ளிவிட்டுவிடுவார்.மும்தாஜ் கடுமையுடன் கண்டிக்க சாரி மேடம் என்று செல்வார்.

    Breakdown என்ற விறுவிறுப்பான படத்தை ஓசியில் காப்பி அடிப்பதே குற்றம்.இதுல அந்தக்கதையை மேற்சொன்ன குல்ஃபி ஐஸ்காரன் கதையெல்லாம் செருகி இதுல அஜீத்தை வேறொரு பெண் விரும்புவதாகவும் இவர் அதை மறுப்பதாகவும் வேறு காட்சி இருக்காம்.

    அய்யா அஜீத் அவர்களே நீங்கள் செவாலியே chivalry என்று சமீபகாலமாக துடிப்பது புரிகிறது.அதுக்கு சொந்தமா ஒரு கதையை உருவாக்கி நடித்திருக்கவேண்டும்.

    விடாமுயற்சி பட விமர்சனத்தில் தமிழ் டாக்கீஸ் மாறன் "இப்படம் ஆங்கிலப்பட காப்பி என்பது அந்த தயாரிப்பு நிறுவனத்துக்கு தெரிந்துபோக பிறகு ஒரு பெருந்தொகையை கொடுத்து சரி செய்ததாக" சொன்னார்.உண்மையில் அதைவிடவும் கூடுதல் தொகையை கேட்டு வாங்கியிருக்க வேண்டும்.ஒரு திரில்லர் படத்தை வேறுமாதிரி கச்சா முச்சா கதையாக்கியதற்கான அபராதம்!

    மேலும் அஜீத் , வீடு பட சொக்கலிங்க பாகவதரின் தீவிர ரசிகர் என்று இப்படத்தின் தோற்றம் மூலம் நிரூபித்திருந்தார்!

.

டிஸ்கி: இன்னமும் விடாமுயற்சி பார்க்கவில்லை.பார்க்கும் எண்ணமுமில்லை.பயில்வான் விமர்சனத்தை வைத்தே நாம் இதை எழுதியுள்ளோம்.

*************************************************

களம்காவல்:

     வழக்கமாக இம்மாதிரி கொலைகாரன் போலீசு கதைகளில் போலீசுக்கு தனிப்பட்ட வாழ்வில் மணமுறிவு/குழந்தையை பார்க்க முடியாமை/மனைவி இறந்துபோவது என்று ஏதேனும் ஒரு சோகத்தை வைத்து அவர் அதை எதிர்கொள்ள ஏதேதோ பொடிகளை உறிஞ்சி/ஐஸ் கட்டி போட்ட அகல பாத்திரத்துக்குள் முகத்தை விடுதல்/ ஷவரின் கீழ் நிற்பது போன்ற தேய்வழக்குகள் இல்லை என்பது பெரும் ஆறுதல்!

      நமதபிமான விநாயகன் கை மடித்துவிடப்பட்ட சட்டை கைக்கடிகாரம் இரண்டின் மூலமே ஒரு காவலரின் தோரணையை கொண்டுவந்துவிட்டார்!ஜெயிலரில் வந்தவரா இவர்? தெக்கு வடக்கு படத்தில் சேட்டை செய்தவரா இவர் என்றெல்லாம் வியக்கவைத்து விட்டார்.

      ஏற்கெனவே Rorshach படத்தில் "இவரா மம்மூட்டி?" என்று வியக்க வைத்தவர் இப்படத்திலும் அதே போன்று மிரட்டிவிட்டார். Rorshach படத்தில் மனிதர் கேமராவுக்கு மிக நெருக்கமாக உட்கார்ந்திருந்தாலும் அவரின் கண்களை பார்க்கையில் எங்கோ ஆயிரம் மைல் தள்ளி அமர்ந்திருக்கும் உணர்வை கொடுத்து மிரட்டி இருந்தார்.இதிலும் அப்படியே! அத்தனை கொலைகளையும் சிறிதும் நடுக்கம் தயக்கம் வருத்தம் இல்லாது செய்யும்போது "யாருய்யா இது?" என்று கேட்க வைத்துவிடுகிறார்.

அதிலும் அவர் கிங்ஸ் லெவன் பிடித்து வட்ட வட்டமாக புகை விடும் காட்சிகள் அதகளம்!

புகைபிடிக்கும் காட்சியை ஸ்பாட்டில் மம்மூட்டி improvise 
செய்ததாக இயக்குநர் கூறி இருந்தார்!

     

"தான் எவ்வளவு பெரிய நடிகன்" என்ற மனவோட்டத்தை குப்பையில் போட்டால் மட்டுமே இப்படியெல்லாம் நடிக்க முடியும்( காசர் கவனிக்க!).படத்தின் குறைபாடுகள் அது இதுவென்று ஏகப்பட்ட ஒலக விமர்சகர்கள் ஆய்வு செய்திருந்தாலும் படம் முழுக்க ஒருவித சில்லிடும் உணர்வை கொடுத்ததை மறக்க முடியாது.அது தவிர இரு மாபெரும் நடிகர்கள் எப்படி நடிக்க வேண்டும் என்று சொல்லாமல் சொல்லியுள்ளார்கள்.இதையெல்லாம் தமிழ் சினிமாவில் உள்ள தென்னாட்டு கிளாஸ் கின்ஸ்கி தென்னாட்டு பிராண்டோ தென்னாட்டு அல் பசினோ ஆகியோர் பார்த்து கற்க முயல வேண்டும்!

அக்கட தேசத்துல 'மம்மூட்டி கம்பெனி' தயாரிப்புல "இப்படியெல்லாம் கதை யோசிக்க முடியுமா?" ன்னு வியக்கவைக்கிற படங்கள்ல அவர்  நடிச்சிட்டு இருக்கார்.ஆனா சார்வாள்? அன்பறிவ் இயக்கத்தில் படத்தை உடப்பில் போட்டாச்சு.இப்ப அடுத்த ஒரு அப்பாவி இயக்குனர் பேர்ல இன்னொரு படத்தை அறிவிச்சிருக்கீங்க.அதுவாச்சும் செல்ஃப் எடுக்குமா?

**************************************************

டிஜிட்டல் கேமராவுக்கு வக்காலத்து வாங்குவோர் தொடர்ந்து சொல்லிவந்தது : "ஃபிலிமில் படமாக்குவதைவிட பலமடங்கு மலிவாக டிஜிட்டலில் படமாக்கி விடலாம்"

       மைனா கும்கி உள்ளிட்ட படங்களுக்கு ஒளிப்பதிவு செய்த எம்.சுகுமார் சாய் வித் சித்ரா நிகழ்ச்சியில் " ஃபிலிமில் படமாக்கும்போது ஒளிப்பதிவில் பிழைகள் இல்லாமல் பார்த்துக்கொள்வது கட்டாயம்.ஆனால் டிஜிட்டலில் அந்த மெனக்கெடல் தேவையில்லை.ஏதேனும் ஒளிப்பதிவில் பிழை இருந்தாலும் "சிஜில பாத்துக்கலாம்" என்று விட்டுவிடுகிறார்கள்.அந்த செலவு ஃபிலிம் செலவை தொட்டுவிடும்" என்றார்..

 மேலும் "டிஜிட்டலில் எடுக்கப்படுவது வெறும் footage தான்.அதில் உயிரோட்டம் கலைநயம் எதுவுமில்லை" என்று தடாலடியாக உண்மையைப்போட்டு உடைத்துவிட்டார்! யப்பா இயக்குநர்களே தயாரிப்பாளர்களே அப்படித்தான் அந்த கருமத்தை பயன்படுத்ததான் வேண்டுமா?

***************************

   

DC

 

இப்படத்தை பார்க்க காரணமே இது விளம்பரம் செய்யப்பட்ட விதத்தினால் தான்! ரத்தம் தெறிக்கும் வன்முறைக்காட்சிகளை பார்த்தபோது "ஆகா!நமக்கு விருந்துதான்!" என்று தோன்றியது.

 

    ஆனால் படம் வன்முறையை மையமாக கொண்டு நகர்வதில்லை.வன்முறை கதையின் ஒரு (அத்தியாவசிய?) பகுதி என்று சொல்லலாம்.

   இப்படி படத்தை விளம்பரம் செய்ததால் சில இழப்புகளும் உண்டு.இந்த "குடும்பத்தோடு படம் பார்ப்போர் சங்கம்/இனிமையாக மென்மையாக மலரும் காட்சிகளை ரசிப்போர் சங்கங்கள்" இப்படத்தை வெறும் ரத்தக்களரி மட்டுமே நிறைந்த படமென்று ஒதுக்கிவிட்டது. படத்தின் மையக்கருத்தை விளம்பரப்படுத்தி இந்த பக்ராக்கள் அப்படத்தை பார்த்திருந்தாலும் இதையெல்லாம் அவர்கள் புரிந்துகொள்ளும் திறன் கொண்டவர்களாக இருப்பார்கள் என்று நாம் நம்பவில்லை!

      தேவதாஸ் பார்வதி சந்திரா என்ற அந்த நூறாண்டு பிரசித்தி பெற்ற அந்த மையக்கருவை நிகழ்கால அவலங்கள் குரூரங்கள் பாலியல் அத்துமீறல்கள்  அதிகார வர்க்கத்தில் இருப்போர் போடும் சாமர்த்தியமான இரட்டை வேடங்கள் ஆதரவற்ற பெண்கள் நடத்தப்படும் விதம் என்று பல்வேறு விஷயங்களை தொட்டு செல்கிறார்.

 

    படத்தை பார்க்கும்போது ஏனோ அனுராக் காஷ்யப் இயக்கிய Dev D மற்றும் முனியாண்டி எழுதிய பிணவறை காப்பாளன் ( இந்த சிறுகதையிலும் சமூகத்தின் மிக உயர்ந்த இடத்தில் இருப்பவர்கள் ஒரு பிணவறை காப்பாளன் உதவியுடன்....இதற்கு மேல் இதைப்பற்றி இங்கே எழுத முடியாது!ஆனால் அது உண்மை சம்பத்தின் அடிப்படையில் அமைந்த கதை)& தேகம் நினைவுக்கு வந்தது.Dev D படமும் தேவதாஸ் கதைதான்.அதில் வன்முறை குறைச்சல் ஆனால் போதை தூக்கல் என்பதாக ஒருவித psychedelic அனுபவத்தை கொடுத்தது.அமித் திரிவேதியின் அற்புத இசையை மறக்க முடியுமா?

 

     இப்படத்தின் மையக்கருத்தாக நாம் கண்டது பெண்களை  சமூகம் பார்க்கும் விதம்! படத்தின் ஆரம்பத்தில் பணத்துக்காக அநியாயமாக அடித்து கொல்லப்பட்ட தனது கணவனுக்கு நீதி கேட்டு செல்லும் அந்த பெண்ணை "பிராத்.தல் வழக்கில் உள்ளே தள்ளிவிடுவேன்" என்று ஒரு காவல் அதிகாரி மிரட்டுகிறார்.பிற்பகுதியில் சந்திரா பற்றி மற்றொரு காவல் அதிகாரி தாசிடம் அதே பொருள்படும் விதத்திலான அந்த வார்த்தையை சொல்கிறார்.அந்த வார்த்தையை படம் நெடுக பலர் சொல்கிறார்கள். தாஸ் அவர்கள் அத்தனை பேரையும் கடுமையாக தண்டிக்கிறான்.

    ஒருகாலத்தில் படிப்பறிவற்ற மக்கள் தெருவில் சண்டை போடும்போது சரளமாக(பெண்களுமே சக பெண்கள் மீது)பயன்படுத்தும் அந்த வார்த்தை இப்போது பரிணாம வளர்ச்சி(!) பெற்று பட்டதாரிகளும் சரளமாக அவ்வார்த்தையை நிஜ உரையாடல்களிலும் இணையத்தில் அதைவிட பலமடங்கு அதிகமாகவும் பயன்படுத்தி வருகிறார்கள்!

       மாற்றுக்கருத்து சொல்லும் ஆண்களை இழிவுபடுத்தவேண்டும் என்றாலும் இந்த வார்த்தையை அந்த ஆணின் வீட்டிலிருக்கும் பெண்களை குறிப்பிட்டு வசைபாடப்படும்! மாற்றுக்கருத்து சொல்லும் பெண்கள்  என்றால் சொல்லவே வேண்டாம்!இந்தியாவிலேயே அதிக படிப்பறிவு கொண்ட மாநிலம் அடைந்த "மகத்தான" வளர்ச்சி இது!(?).இதையெல்லாம் தம் கட்டி சொல்வதற்கு காரணம் பதிவின் இறுதியில்...

    மிக சமீபத்தில் புதிதாக ஆரம்பிக்கப்பட்டுள்ள அந்த இயக்கத்தை சேர்ந்தவர்களுமே (ஒரு மணி நேரத்தில் இத்தனை லட்சம் பேர் இணைந்ததாக செய்தி வந்தது) இப்படித்தான் இணையத்தில் "கண்ணியமாக"  உரையாடுகிறார்கள்! இந்த விஷயத்தில் யாரும் எந்தவித மாற்றத்தையும் உண்டுபண்ணிவிட முடியும் என்று நாம் நம்பவில்லை. ஞாநி சங்கரன் சொன்ன " பள்ளியிலேயே சமூக வலைதளங்களை கண்ணியமான முறையில் பயன்படுத்துதல் பற்றிய பாடத்தை கொண்டுவர வேண்டும்" என்ற யோசனையெல்லாம் எடுபடும் என்று நாம் நம்பவில்லை!

   ஆனால் இந்த  விஷயத்தை படத்தில் அழுத்தமாக பதிவுசெய்த அருண் மாதேஸ்வரனை பாராட்டலாம்.இவர் இதற்கு முன் எடுத்த படங்கள் என்ன என்று நாம் தேடித்தான் தெரிந்து கொண்டோம்.அவைகளையும் பார்க்க வேண்டும் என்ற எண்ணத்தை இப்படம் உண்டாக்கியுள்ளது.

 

     படத்தில் சின்னசின்ன அற்புத தருணங்கள் உண்டு.சமூகத்தில் பெரிய பெரிய பதவிகளில் இருப்போர் பாலியல் தொழிலாளர்களிடம் நடந்துகொள்ளும் விதம் ஒருவிதமாகவும் வெளியே அவர்கள் போடும் வேடம் வேறொரு விதமாகவும் இருப்பதை அற்புதமாக படம் சொல்கிறது.தங்களது "பெரிய மனுஷன்" இமேஜ் போய்விட கூடாது என்பதற்காக சந்திராவிடம் காவல் அதிகாரி மருத்துவர் தொழில் அதிபர் என்றெல்லாம் பலதரப்பட்ட "பெரிய மனுஷன்கள்" பணத்தை அள்ளிக்கொடுக்கும் காட்சி சிரிப்பதா வருந்துவதா என்று தெரியாத ஒரு மனநிலையை உண்டாக்கியது!அந்த மருத்துவரை சந்திரா கொல்லும் காட்சி உண்மையிலேயே அற்புதம்!குறிப்பாக தனக்கு சிறுவயதில் இழைக்கப்பட்ட அந்த ஈடுசெய்ய முடியாத இழப்பிற்கு காரணமான அந்த டாக்டரை கோபத்தின் வெறியின் உச்சத்தில் வார்த்தைகளே வராமல் போக உறுமியபடியே சுட்டு தள்ளும் காட்சி காலத்திற்கும் பேசப்படும்! இது வாமிகாவிற்கு வாழ்நாள் வேடம். வித்தியாசமான தமிழ் உச்சரிப்பில்(கதைப்படி அவர் பெங்காலி என்று சொல்லி தேவதாஸ் கதைக்கு வலு சேர்த்துள்ளார்கள்!) புதுமையான நடிப்பை வெளிப்படுத்தியுள்ளார்!

 

      இதில் பெரிதும் பாராட்டப்படவேண்டிய விஷயம் படத்தில் "சமூகவிரோத" செயல்களை செய்வதாக காட்டப்படும் தாஸ் & கோ எந்த இடத்திலும் கொள்கை கோட்பாடு மோவாயிஸம் என்றெல்லாம் அடித்துவிடுவதில்லை.அவர்கள் அனைவருமே அந்தந்த சூழ்நிலைக்கு தக்கவாறே நடந்துகொள்கிறார்கள்.இதுவே வெற்றிமாறன் படமாக இருந்தால் தாஸ் பக்கம் பக்கமாக மோவாயிஸம் பேசியிருப்பார்!

     டிஜிட்டல் கேமரா எனும் திராபையை வைத்துக்கொண்டே இடைவேளை தருணத்தில் அந்த ஏரிக்கரை சூரியஒளி பிரதிபலிப்பு காட்சி ,படத்தின் பிற்பகுதியில் தாஸ் மற்றும் சந்திரா ஒரு குன்றின் உச்சியில் நின்று பேசும் சமயத்தில் பின்னணியில் சூரியன் தெரியும் காட்சி எல்லாம் உண்மையிலேயே அற்புத தருணங்கள்!முகேஷ் ஜி - ன் ஒளிப்பதிவு பாராட்டுக்குரியது!

 

 

         "அனிருத் என்றாலே இரைச்சல்" மாதிரியான sweeping statements எதையும் நாம் எப்போதுமே சொன்னதில்லை.காரணம் அனிருத்திடம் கண்டிப்பாக இசைத்திறன் உள்ளது(அவர் சில நல்ல மெலடி பாடல்களை கொடுத்துள்ளார்).அதை சரியாக வெளிக்கொண்டு வந்தால் இயக்குநருக்கு லாபம்."இல்ல...வழக்கமா போடுற டப்பாங்குத்தையே போடு" என்றால் அதையே கொடுப்பார்.விக்ரம் படத்தின் பின்னணி இசைக்கு பிறகு(கொஞ்சம் நெல்சன் படங்களிலும்)மற்றொரு அற்புதமான இசை அனுபவம் இப்படம். தாஸ் சந்திரா இருவரும் தனிமையில் அந்த வேனில் பேசிக்கொள்ளும் காட்சியில் வரும் பின்னணி இசை ஒரு உதாரணம்(Das and Parvathy track)! இது தவிர Raga of revenge,Bum ba diga diga,Raga of rage, ஜெய ஜெய சங்கர, Echoes of DC எல்லாமே அட்டகாசம்! இதில் Rose (Instrumental) கொஞ்சம் ராஜேஷ் முருகேசன் இசையமைத்த பிரேமம் படத்தின் Unfinished Hope போல இருக்கு.

 

    லோகேஷ் நாயகனாக நடிக்கிறார் என்றதுமே "எதுக்கு விஷப்பரிட்சை" என்றே தோன்றியது.அதை பொய்ப்பித்துவிட்டார்.என்ன லோகேஷ் மாஸ்டர் & விக்ரம் படங்களை இயக்கிய சமயத்தில் இருந்த தோற்றத்திலேயே இப்படத்திலும் நடித்திருக்கலாம்.எதற்கு புட்டபர்த்தி ஹேர்ஸ்டைல் என்று புரியவில்லை.பார்வதியுடனான உரையாடலில் "எனக்கு புடிச்ச சக்குச்சக்கு வத்திக்குச்சி பாட்டை பாட சொல்லு" என்று நக்கல் அடிக்கிறார். அந்தப்பாட்டை லோகேஷ் தொடர்ந்து பிரபலப்படுத்திவருவது தெரிந்ததே!

இதே கெட்டப்பில் கூட அவர் நடித்திருக்கலாம்!

 

படத்தின் சண்டைக்காட்சிகள் ரணகளம். ஸ்டண்ட் மாஸ்டர் விஜய் கபிலன்( ஆஸ்கர் ரவிச்சந்திரன் மாதிரி இவரின் ஒரு புகைப்படமும் கிடைக்கவில்லை) ஏற்கெனவே மகாராஜா மற்றும் ஆத்மன் நடித்த வெந்து தணிந்தது காடு படங்களில் எதார்த்தம் கலந்த உக்கிரமான சண்டைக்காட்சிகளை அமைத்தவர்.இப்படத்தின் இடைவேளை சண்டைக்காட்சி ரணகளம்! வெட்டப்பட்ட கை மற்றொரு நபரின் கையை பிடித்தபடியே தொங்கி கொண்டிருப்பது ஆஷம்! ஏற்கெனவே விஸ்வரூபம் படத்தில் எவனென்று நினைத்தாய் பாடலில்

 இதேமாதிரி ஒரு தருணம் வரும்! 

 படத்தில் ரசனையான கிங்ஸ் லெவன் தருணங்கள் பல உண்டு.பார்வதி கிங்ஸ் லெவனை தாசிடம் நீட்டும்போது "விட்டுட்டேன்" என்று மறுக்கிறான்.பிறகு பார்வதி கொல்லப்பட்டதும் மீண்டும் கிங்ஸ் லெவனை ஆரம்பிக்கிறான்.சந்திராவின் காதலை ஏற்கும் தருணத்தில் அதை விடுகிறான்! எப்போதுமே கிங்ஸ் லெவன் உதவியுடன் ஏகப்பட்ட அற்புத தருணங்களை திரையில் கொண்டுவரலாம் என்று நாம் தொடர்ந்து சொல்லி வருவது மீண்டும் ஒருமுறை நிரூபிக்கப்பட்டுள்ளது!

 

  இதுல தேவையில்லாத ஆணி என்பதாக அந்த தாடிக்கார போலீசு கேரக்டர்.படம் முழுக்க திருட்டுமுழி முழித்தபடி குடும்பத்தினரோடு போனில் பேசிக்கொண்டே இருக்கிறார்.கடைசியில் ஏதோ பெரிதாக செய்யப்போகிறார் என்று பார்த்தால் ஒரு மண்ணும் இல்லை.அந்த கதாபாத்திரத்தின் பெயருக்காக சும்மா வச்சிருக்காங்க போல என்று பிறகு புரிந்து கொண்டோம்!

 

 

 

       தற்கால தமிழ் சினிமா பாணியிலேயே இப்படத்திலும் கல்வியின் மகத்துவம் வசனங்களால் அல்லாது காட்சிகளால் உணர்த்தியுள்ளார்கள். "அந்த குரூரமாக கொல்லப்பட்ட  விவசாயி  மகனின் கல்வி செலவுக்காக காசு கொடுக்காமல் நான் ஆந்திரா போகமாட்டேன்" என்கிறான் தாஸ்.அவனிடம் "படி" என்று வழக்கமான தமிழ் சினிமா ஹீரோ வசனத்தை சொல்கிறார்.

     எல்லாம் சரிதான்.படித்து வேலைக்கு போனால் தற்கால  குடும்பத்தின்... ஏன் அடுத்தடுத்த தலைமுறைகளின் வாழ்க்கைத்தரம் மேம்படும் என்பதை நாம் மறுக்கவில்லை.கல்விக்கு இவ்வளவு முக்கியத்துவம் கொடுக்கப்படுவதற்கு காரணமும் அதுவே! ஆனால் இங்கே ஒரு ஃ- ன்னா வாக இதே படத்தில் மெத்த படித்தவர்கள் தான் சந்திராவிடம் ஈவிரக்கமின்றி பாலியல் வல்லுறவில் ஈடுபடுகிறார்கள்! சந்திராவை குரூரமாக  கொடுமைப்படுத்தி மகிழ்கிறார்கள்! இவர்களும் நன்றாக படித்து நல்ல வேலையில் இருப்பவர்கள்தான்.ஆக கல்வி என்பது முக்கியம் என்றாலும் அதையும் தாண்டிய ஒரு கற்றல் தேவைப்படுகிறது.அதை இதுவரை எந்த தமிழ்ப்படமும் பேசியதாக நாம் கண்டதில்லை!

    ஆனால் அதையெல்லாம் ஒத்திவைத்துவிட்டு பார்த்தால் இது மீண்டும் ஒருமுறை பார்க்கத்தூண்டும் படம் என்பதில் சந்தேகமில்லை!

     

   

    

Pradeep Ranganathan Chronicles

 

பிரதீப் ரங்கநாதனை ரசிப்பவர்களை "2K கு.ஞ்சான்" "ரசனை கெட்டவர்கள்" " காலம் செல்லச்செல்ல எப்படியெல்லாம் ரசனை வீழ்ச்சி அடைகிறது பாருங்கள்!" என்று ஈஸி சேரில் படுத்தபடி விட்டத்தை பார்த்து அங்கலாய்க்கும் 90s மற்றும் அதற்கு முந்தைய தலைமுறை "கிட்ஸ்கள்" ( நீ 319 நாட்டவுட் என்பதால் இதில் எதிலுமே வரமாட்டியே உதயா - கும்மாங்கோ) என்று ஒரே கொந்தளிப்புகள்! நமக்கு தெரிந்து இதனாலேயே பலர் பிரதீப்பின் படங்களை ரசித்தாலும் அதை வெளியில் காட்டிக்கொள்ள பயப்படுகிறார்கள் என்று உறுதியாக நம்புகிறோம்! 

 

 . 

 

கோமாளி படம் நமக்கு பிடிக்கவில்லை.அது உண்டாக்கிய ஒவ்வாமை பற்றி அப்போதே ஒரு முகநூல் பதிவு போட்டிருந்தோம்.

    அந்த இயக்குநர் ஹீரோவாக இயக்கி நடிக்கிறார் என்றதுமே காததூரம் ஓடிவிட்டோம்(லவ் டுடே).இன்றைக்கும் நாம் அந்த படத்தை பார்க்கவில்லை. சத்யராஜின் மிகையான பாத்திரப்படைப்பு மற்றும்  தனது வழக்கம்போல அதை மிகைநடிப்பால் பார்ப்போரை நடுங்க வைத்திருப்பார் என்ற உறுதியான நம்பிக்கை  என்று பல காரணங்கள்.

     பிறகு டிராகன். அந்த படத்தையும் உடனே பார்க்கவில்லை.பயில்வான் விமர்சனத்தில் "ஜாலியா நாலு வருசம் காலேஜ் படிச்சாமாதிரி ஒரு அனுபவம்" என்றதால்  "பார்க்கலாமோ?" என்ற சந்தேகத்தை மட்டுமே உண்டாக்கியது.

 

பிறகு தற்செயலாக ஒரு காட்சி பார்க்க நேர்ந்தது.பிரதீப் காரில் இருந்தபடியே முடிந்துபோன கிங்ஸ் லெவனை ஸ்டைலாக சுண்டிவிட அது பக்கத்து காரில் இருக்கும் கல்லூரி முதல்வர் மிஷ்கின் மேல் பட்டுவிட அப்போது ஏழரை பிடிப்பதாக வந்த காட்சி பிடித்திருந்தது.நமது அபிமான பாண்டா மிஷ்கினுக்கு ஏற்ற கதாபாத்திரமாக இருக்கே என்று தோன்றியதாலேயே பார்த்தோம்.

 

    படத்தை பார்த்துக்கொண்டிருக்கும்போதே பாதியில் நிப்பாட்டி இது மலையாள படத்தின் ரீமேக்கா? என்று ஒருமுறை உறுதி செய்துகொண்டோம். காரணம் மலையாள சினிமாக்களில் தான் இவ்வளவு உற்சாகம் கரைபுரண்டு ஓடும்.தமிழ் சினிமா என்றாலே ஹைடெசிபல் ஒப்பாரி என்றுதான் இருக்கு(ம்).

       அந்தப்படம் பெரும்பாலும் பிடித்திருந்தது.மீண்டும் ஒருமுறை பார்ப்போமா? என்றால் 'கண்டிப்பாக!'.  'பெரும்பாலும்' என்று சொல்ல காரணம் படத்தின் இறுதியில் வந்த டிபிக்கல் தமிழ் சினிமா சென்டிமென்ட் பிழிதல்!

     ஏமாற்றி வேலைக்குப்போய் மஜாவா இருக்கான்.பெரிய பணக்கார பெண்ணை கட்டிக்க போறான் என்றெல்லாம் கதை ஜாலியாத்தான் போச்சு.ஆனா திடீர்னு பேப்பர் சேசிங் செய்ததால் ஒரு பரம ஏழை மாணவனின் கூகுள் வேலை கனவு பறிபோனது(அந்த மாணவனுக்கு ஒரு நோய்வாய்ப்பட்ட தாய் ,அவன் வசிக்கும் ஓட்டை வீடு அது இதுவென்று பக்கா தமிழ் சினிமா சென்டிமென்ட் மசாலா!) அதற்காக ராகவன் எல்லாத்தையும் தியாகம் செய்வதெல்லாம் பக்கா தமிழ் சினிமா பாணி!
    நான் படத்தில் விஜய் ஆண்டனி எல்லா பிராடு வேலைகளையும் செய்துவிட்டு திடீரென்று அந்த சலீம் என்ற மரித்துப்போன இளைஞனின் குடும்பத்தை காப்பாற்றுவதாக காட்டிய அதே டெம்ப்ளேட் சென்டிமென்ட் காட்சிகள் தான் இதில் உறுத்தல்.மற்றபடி ஒரே ரணகளம் தான்.

   

 

.
தோற்றம் :

தோற்றம் சார்ந்து எவரையும் விமர்சித்தல் கூடாது என்று சொன்ன அதே உலக விமர்சகர் குழு பிரதீப்பை தோற்றம் சார்ந்தே விமர்சிப்பது நகைமுரண்.அப்படி " old school hero லுக்" கொண்ட நடிகர்கள் என்று இன்று பார்த்தோமானால் காசர் அஜீத் அரவிந்த்சாமி ஜெயம்ரவி/ரவிமோகன் ஷாம் என்று எல்லாருமே நடுத்தர வயதை தாண்டியவர்கள்/அடைந்துவிட்டவர்கள்.மிஞ்சி இருப்பது ஆத்மன் மட்டுமே ( ஸ்லீப்பர் செல் வேலையை காட்டிட்டியே! - கும்மாங்கோ).

 

      அதனால் தோற்றத்தில் சிறந்து விளங்கும் இளம் நாயகன் என்றெல்லாம் இப்போது (ஆத்மன் தவிர்த்து) யாருமில்லை.அசோக் செல்வன் கவின் ரியோ மணிகண்டன்  ரிஷிகாந்த் போன்றவர்கள் சராசரி தோற்றம் கொண்டவர்கள் என்பதால் இதில் சேர்க்க முடியாது.

     என்னமோ தமிழ் சினிமாவில் இருப்பவர்கள் எல்லாருமே தோற்றத்தில் செம்ம ஸ்மார்ட்டாக  இருப்பது போலவும் பிரதீப் மட்டுமே இப்படி இருப்பதாகவும் சொல்வதே லாஜிக் இல்லாத வாதம்.

    மேலும் பிரதீப்பை தனுசுடன் ஒப்பீடு செய்கிறார்கள்.தனுசு நடிக்கவந்த புதிதில் பார்க்க " பிஹார்காரனா  தோற்றமளித்தாலும் தமிழ் பேசுறானேய்யா" என்பதாகத்தான் இருந்தார்!(ஆத்மன் பாசறை சார்பில் வன்மத்தை கொட்டிட்டியே - கும்மாங்கோ).ஆனால் தோற்றத்தில்  பிரதீப் அப்படி இல்லை.

ஆளு பாக்க வடக்கனா தெரிஞ்சாலும் நல்லா தமிழ் பேசுறியே! 

 

    மேலும் பிரதீப்பின் பலமே funk வைத்த சுருள் தலைமுடி தான்.எனவே மிலிட்டரி கட்டிங்,கிராப் கட்டிங் mohawk ஸ்பைக் மொட்டை எண்ணெய் போட்டு வழித்து சீவுதல்  என்றெல்லாம் வேறு மாதிரி முயற்சித்தால் காலி.பின்னால் வளர்ந்திருக்கும் funk முடியை கூட வெட்ட கூடாது.வெட்டினால் அம்புட்டுதேன்!

 
      ஒருகாலத்தில் ஹர்பஜன் சிங் சீக்கிய வழக்கத்தை மீறி தனது  கத்தரிக்கப்படாத முழு சிகையுடன் ஒரு விளம்பரத்துக்கு போஸ் கொடுத்தார்.அத்தோடு அவரது கிரிக்கெட் வாழ்க்கை சரிவை நோக்கி மிக வேகமாகவே சென்றது!மீளவே இல்லை!

 

    அந்த சுருள் சுருளான பிடரிதான் பிரதீப்புக்கு ஒருவித ஆராவை கொடுக்குது(இதே போன்ற வரிகளை ஒருகாலத்தில் ஒங்க இவருக்கு விமர்சகர்கள் சொன்னது நினைவில் வருகிறது 😃)!அவரது எனர்ஜி லெவல் மற்றுமொரு பலம்.
.

 நடிப்பு:

கண்டிப்பாக பிரதீப்பின் நடிப்பு என்பது அமெச்சூர்த்தனத்தின் உச்சம் என்று சொல்லாம்.அதில் மாற்றுக்கருத்து இல்லை.திடீரென்று ஜெர்க் ஆகி ஜம்ப் பண்ணி பதில் சொல்வது (இதுல கொஞ்சம் கிரெடிட் நாகேஷுக்கு செல்ல வேண்டும்)விரல் வித்தைகள் காட்டுவது செல்போனை தூக்கிப்போட்டு பிடிப்பது சத்தமாக எதிர்வினை ஆற்றுவது.....இரு இரு.. 'இதெல்லாம் ஏற்கெனவே ரஜினி செய்யல?' என்ற எண்ணம் எழாமல் இல்லை.

    ஆனால் அதுதான் பிரதீப்பின் பலமாக மாறிவிட்டது.இனி அவர் subtle ஆக எதிர்வினை ஆற்றுகிறேன் நிதானமாக நடி(ட)க்கிறேன் என்றெல்லாம் செய்தால் படம் பப்படம் ஆகும்!

    மேலும் அவர் இதேபோன்று நகரம் சார்ந்த காதல் கதைகளில் மட்டுமே நடித்தால் மேலும் பல உயரங்களை அடையலாம்.அதை விடுத்து கிராமத்து மண்ணை அப்படியே குழைத்து ஒரு காவியமாக வடித்து அதில் குரூடு ஆயில் மேக்கப்பில் தலையில் சாக்கு மாட்டிக்கொண்டு மழையில் குத்தவச்சு பின்னணியில் கிழவியின் "ஏ....ஆயி" ஒப்பாரி அது இதுவென்று முயன்றால் அத்தோடு அவரது திரை வாழ்க்கை ஓவர்!( விக்ரம் தாக்கப்பட்டார்? - கும்மாங்கோ)

.
சர்ச்சைகள் :

   சர்ச்சை எனும் பெட்ரோலில் தான் தமிழ் சினிமாவில் பலரது கரியர் வண்டிகள் ஓடிக்கொண்டிருக்கின்றன( சூரியனை பெயராக கொண்டவரா? - கும்மாங்கோ).பிரதீப் அதை சாமர்த்தியமாகவே பயன்படுத்தி கொள்கிறார்.Dude படத்தின் கதையை விடவெல்லாம் பேரதிர்ச்சி உண்டாக்கும் கதைகள் கே.பி எடுத்துள்ளார்.ஆனால் உலக சினிமா போராளிகள் dude படத்துக்கு எதிராக  மிகையாக கொதித்தெழ அதுவே அப்படத்தின் வெற்றிக்கு  (பிரதீப்,மமிதா,  ஊறும் பிளட் ஆகியவை தவிர்த்து) மற்றுமொரு  காரணமாகி விட்டது. 

 . இப்படத்திலேயே மமிதா உடனான ஜோடி இயல்பானதாக இருந்தது.ஆனா ரெண்டு படம் தாண்டி ஜோடியாக நடித்தால் உடனே இணைய போராளிகள் கொதித்து எழுவது ஒருபுறமிருக்க ஊடகங்கள் கிசுகிசு எழுதியே காலி செய்துவிடுவார்கள்.அந்த காலத்திலேயே உத்தம்குமார் சுசித்ரா சென் சிக்கல் இல்லாது இருபத்தைந்து படங்களில் ஜோடியாக நடித்தனர்(அதற்காக அவர்களோடு இவர்களை இணை வைத்ததாக கொந்தளிக்க வேண்டாம்).இந்த கிசுகிசுக்களுக்கு பயந்தே சிவகார்த்திகேயன் பிரியங்கா மோகனுடன் (இவர்கள் ஜோடியும் இயல்பாக இருந்தது) நடிப்பதை தவிர்த்தார்.இதுல "தெற்குல தான் முற்போக்கு பிதுங்குது" என்று மார்தட்டல் வேற!என்ன கொடுமை.... 

 

Dude படத்திலுமே இளைஞர்களின் நவீன சிந்தனை போக்குக்கு, அணுகுமுறைக்கு  காரணம் உலகமயமாக்கல் என்ற உண்மையை ஒப்புக்கொள்ளாத இயக்குனர் இதற்கெல்லாம் காரணம் "நூறு வருசத்துக்கு முன்னாடி இருந்த தாடிக்கிழவர் தான்" என்று அடித்து விட்டதை அந்த தாடிக்கிழவரே (ஒருவேளை இப்போது இருந்திருந்தால்) நம்பாமல் இயக்குனர் மண்டையில் தடியால் ஒரு போடு போட்டிருப்பார்! பிரதீப்  இந்தமாதிரி அடுத்தவர் கொள்கையை பரப்பும் கைத்தடியாக தன்னை பயன்படுத்திக்கொள்ள அனுமதிக்காமல் இருத்தல் நன்று.
 

    சமீபத்தில் தில்லியில் நடந்த மாணவர் போராட்டத்தை பற்றி ஒரு எக்ஸ் பதிவு போட்டு அனைவரையும் கொந்தளிக்க வைத்ததை பார்த்தபோது " எப்போ எங்க ட்ரிக்கர் பட்டனை அழுத்தனும்னு பய கரக்ட்டா புடிச்சிட்டான்" என்று தோன்றியது 😃

 

     சரியான கால இடைவெளியில் அப்பப்போ ட்ரிக்கர் பட்டனை இப்படி தட்டிக்கிட்டு இருந்தாலே லைம்லைட்டில் மெயின்டெய்ன் பண்ணிக்கலாம்! 😀

    விக்னேஷ் சிவன் இயக்கத்தில் நடித்து கையை சுட்டுக்கொண்டுவிட்ட நிலையில் ஏற்கெனவே தான் அமைத்த வெற்றி கூட்டணி இயக்குநர்களுடனோ அல்லது அதுபோன்ற ஒத்த சிந்தனை கொண்ட இளம் இயக்குநர்களுடனோ( விசி மாதிரி ஏற்கெனவே பப்படம் கொடுத்த இயக்குநர்களை தள்ளியே வைத்து) பயணித்தால் அவர் இன்னும் உயரங்களை அடையலாம்!

டிஸ்கி: என்னதான் PR Chronicles எழுதினாலும் நாம எப்பவுமே ஆத்மன் பாசறை ஸ்லீப்பர்செல் தாங்க! (க்கும்.இனி இவன நம்ப முடியாது.கண்காணிக்க வேண்டியதுதான் - கூல் சுரேஷ்)

 

Deva,Nelson & prejudice!

 ரெட் படத்தில் ஒரு காட்சி. மாயக்காவுக்கு செல்லூர் சீனி....சாரி...சாரி...(யோவ் கதாபாத்திரங்களின் அசல் பேரை சொல்லி சிக்கிக்காத - கும்மாங்கோ).... ரெட் மீது தீராத ஆசை.சார்லியிடம் மாயக்கா பேசிக்கொண்டிருக்கையில் கனவு....டூயட்....ஸ்டாப்...

 

   இந்த காலகட்டத்தில் இங்க ஒரு டூயட் பாட்டென்றால் எப்படி இருக்கும்?அப்படியே லோக்கல் மண்ணை குழைத்து கேட்பவன் காதில் ஊற்றுகிறேன் பேர்வழி என்று டப்பாங்குத்த கிழித்து ஒரு வழி பண்ணிவிடுவார்கள்!

    ஆனால் தேவா அப்படியே அதற்கு எதிர் திசையில் சிந்தித்தார்! ஏன் இவர்கள் "உலகில் உள்ள உயர்ந்ததெல்லாம் புசிக்கும் ரசிகர்களாக" இருக்கக்கூடாது? ஏன் இவர்கள் மேற்கத்திய அதிரடி beats கொண்ட பாடலுக்கு ஆடக்கூடாது?

 

    ஆத்மன் பாடியதிலேயே நமக்கு மிகவும் பிடித்த பாடலென்றால் இதுதான்.இத்தனைக்கும் அவர் ஹீரோவாக அந்தாண்டு இறுதியில் அறிமுகம் ஆகும்முன்பே அஜீத்துக்கு பாடியதெல்லாம் பெரிய சாதனை.( சரி ஆத்மன் பாசறை வேலை போதும்.வந்த விஷயத்தை சொல்லு - கும்மாங்கோ)

 

    இப்ப கட் பண்ணா ஜெயிலர் படம்.விநாயகன் சிலைகடத்தல் பேர்வழி.அடியாட்களை வைத்துக்கொண்டு ராஜ்ஜியம் செய்கிறான்.அவனுக்கு ரிலாக்ஸ் செய்ய அவ்வப்போது பாட்டு போட்டு தனது அல்லக்கைகளை ஆட விடுகிறான்.

டிக் டாக் ரமேஷ் - மறைந்துபோன ஒரு அற்புத கலைஞன் 

 

    நிற்க! வழக்கமான  முற்போக்கு இயக்குநர் யாராவது இக்காட்சியை எடுத்திருந்தால் "ஏ... ஆயி..." என்று கிழவியின் ஒப்பாரியில் ஒரு டப்பாங்குத்து இசையை சேர்த்திருப்பார்கள்.
    நெல்சனிடம் பிடித்த விஷயமே இதுதான்.சட்டென்று பார்வையாளன் யூகிக்க முடியாத ஒரு எதிர்வினையை/இசையை/வசனத்தை வைத்துவிடுவார்.

    

இப்படத்திலும் அப்படித்தான்.Taal Se Taal Mila என்று சுக்விந்தர் சிங் (பாடலை உருவாக்கியதே அவர்தான் என்றொரு சர்ச்சையும் ஓடிட்டு இருக்கு) பாட அல்லக்கைகள் ஆட...உண்மையிலேயே அக்கட்சி புதுமையாக இருந்தது.

   அதிலும் பாடல்கள் ஒலிப்பது அட்டகாசமான Bose Sound link Revolve II மாடல் ஸ்பீக்கரில்....

   பிறகு வேறொரு தருணத்தில் ஒங்க இவருக்கு செக் வைத்துவிட்டு மற்றொரு பாடல்..

கண்ணோடு காண்பதெல்லாம்....

    "பொதுமைப்படுத்துதல் என்பதே கூடாது"."இவர்கள் இப்படித்தான் என்று முன்முடிவுக்கு வருவது தவறு" என்றெல்லாம் ஊருக்கு உபதேசம் செய்யும் அதே போராளி இயக்குநர்கள் வைக்கும் காட்சிகள் கதாபாத்திர சித்தரிப்புகள் எல்லாமே அதே முன்முடிவு/ பொதுமைப்படுத்துதல் வகையறாவில் வருவதாகத்தான் இருக்கு.நாம் ஏற்கெனவே வேட்டையன் பற்றிய பதிவில் "அபிராமி கெட்ட கதாபாத்திரம் என்பதால் அவர் vaping செய்கிறார் என்று காட்டுதல் பொதுமைப்படுத்துதல் வகையறாவில் வராதா?" என்று கேட்டிருந்தோம். இயக்குநர்,வேட்டையன் படத்தை ஞானவேல் எடுத்ததே பொதுமைப்படுத்துதல் &முன்முடிவுகள் கூடாது என்று உணர்த்தவே எனும்போது இந்த ஒற்றை முரணில் அவரது மொத்த நோக்கமும் அடிபட்டு போனது!

 

     ஏன் அடித்தட்டு மக்கள் இசை ரசனை என்பது சொல்லி வைத்தாற்போல ஒரே மாதிரி தான் இருக்க வேண்டுமா?ஏன் அது மேற்கத்திய இசை சார்ந்து இருக்க கூடாதா? "அவர்களுக்கு அதெல்லாம் தெரிந்திருக்க வாய்ப்பே இல்லை" எனும் முன்முடிவால் தானே நீங்கள் அப்படி கட்சிகள் வைப்பதில்லை? அது தவறில்லையா?எதுக்கிந்த இரட்டை வேடம்?

 

   எப்படி இருந்தாலும் புரட்சி முற்போக்கு என்று ஊரை ஏமாற்றாத தேவா மற்றும் நெல்சன் ஆகியோர் தான் இந்த பொதுமைப்படுத்துதல் மற்றும் முன்முடிவுகளை தாண்டி சிந்தித்துள்ளனர்!அவர்கள் பாராட்டுக்குரியவர்கள்!